اسلام آباد اور راولپنڈی سے تعلق رکھنے والے مختلف مکاتبِ فکر کے ممتاز علماء کرام مشائخ عظام خطباء اور مذہبی شخصیات کا اجلاس منعقد

وزارتِ مذہبی امور و بین المذاہب ہم آہنگی کے زیر اہتمام محرم الحرام 1448ھ کے دوران امن و امان اور مسلکی ہم آہنگی کو یقینی بنانے کے لیے اسلام آباد اور راولپنڈی سے تعلق رکھنے والے مختلف مکاتبِ فکر کے ممتاز علماء کرام مشائخ عظام خطباء اور مذہبی شخصیات کا اجلاس منعقد ہوا اجلاس میں محرم الحرام کے دوران امن و امان کی صورتحال کو برقرار رکھنے مذہبی رواداری کے فروغ اور بین المسالک ہم آہنگی کے لیے غور و خوض کیا گیا جس کے بعد علماء کرام نے متفقہ ضابطہ اخلاق پر اتفاق کیا اعلامیے میں تمام مکاتبِ فکر سے محبت رواداری افہام و تفہیم اور باہمی احترام کی فضا قائم رکھنے کا عہد کیا گیا دوسرے مسالک کے اکابرین اور مقدسات کے احترام اشتعال انگیز تقاریر و تحریروں سے اجتناب اور مسلکی تنازعات کو مکالمے اور مشاورت کے ذریعے حل کرنے پر زور دیا گیا علماء کرام اور خطباء سے اپیل کی گئی کہ وہ اپنی تقاریر اور تحریروں میں اعتدال اور توازن برقرار رکھیں جبکہ عوامی پلیٹ فارمز پر ایک دوسرے کے خلاف طعن و تشنیع سے گریز کیا جائے اعلامیے میں امہات المومنین صحابہ کرام اہلِ بیت اطہار، اولیائے کرام تابعین تبع تابعین اور تمام اکابرینِ امت کے احترام کو یقینی بنانے پر زور دیا گیا مذہبی منافرت پھیلانے والے مواد کی نشاندہی اور رپورٹنگ کے لیے متعلقہ اداروں سے رابطہ کرنے کی بھی ہدایت کی گئی اجلاس میں اس عزم کا اظہار کیا گیا کہ قومی و ملکی معاملات میں تمام مکاتبِ فکر کے علماء متحد رہیں گے علماء و خطباء کو واقعۂ کربلا کے پیغام کے ساتھ فلسطین اور کشمیر کے مظلوم عوام سے اظہارِ یکجہتی کا بھی کہا گیا وزارتِ مذہبی امور نے صوبائی حکومتوں سے بھی اپیل کی ہے کہ محرم الحرام کے دوران بین المسالک ہم آہنگی اور امن کے فروغ کے لیے صوبائی اور ضلعی سطح پر بھی ایسے اجلاس منعقد کیے جائیں