کراچی میں زلزلے کے ہلکے جھٹکے، شہریوں میں خوف و ہراس 2.9 شدت کے زلزلے کا مرکز کراچی گہرائی 10 کلومیٹر ریکارڈ کسی جانی یا مالی نقصان کی اطلاع نہیں

اسلام آباد :کراچی کے مختلف علاقوں میں ہفتہ کی شب زلزلے کے ہلکے جھٹکے محسوس کیے گئے جس کے باعث شہریوں میں خوف و ہراس پھیل گیا اور متعدد افراد احتیاطاً گھروں دفاتر اور دکانوں سے باہر نکل آئے محکمہ موسمیات کے مطابق زلزلے کی شدت ریکٹر اسکیل پر 2.9 ریکارڈ کی گئی جبکہ اس کا مرکز کراچی اور گہرائی زمین کے اندر 10 کلومیٹر تھی زلزلے کے جھٹکے مختصر دورانیے کے تھے، تاہم شہر کے مختلف علاقوں میں لوگوں نے انہیں واضح طور پر محسوس کیا کئی شہری احتیاطاً کھلی جگہوں پر جمع ہوگئے، جبکہ سوشل میڈیا پر بھی زلزلے سے متعلق اطلاعات تیزی سے گردش کرتی رہیں ابتدائی اطلاعات کے مطابق زلزلے کے نتیجے میں کسی جانی یا مالی نقصان کی اطلاع موصول نہیں ہوئی تاہم متعلقہ ادارے صورتحال پر مسلسل نظر رکھے ہوئے ہیں ماہرین کے مطابق کم شدت کے زلزلے عموماً بڑے پیمانے پر نقصان کا باعث نہیں بنتے تاہم شہریوں کو ایسے مواقع پر احتیاطی تدابیر اختیار کرنی چاہئیں اور غیر مصدقہ خبروں پر یقین کرنے کے بجائے صرف سرکاری ذرائع سے معلومات حاصل کرنی چاہئیں یاد رہے کہ دو روز قبل کوئٹہ سمیت بلوچستان کے مختلف علاقوں میں بھی 4.0 شدت کے زلزلے کے جھٹکے محسوس کیے گئے تھے جبکہ اس سے قبل 28 جولائی کو جاپان کے جنوبی جزیرے کیوشو میں 7.1 شدت کے طاقتور زلزلے نے متعدد عمارتوں کو نقصان پہنچایا اور کئی افراد زخمی ہوئے تھے