ایتھوپیا کے سفیر ڈاکٹر جمال بکر کی پاکستان کے سیکرٹری دفاع سے ملاقات
راولپنڈی:30 جون 2025, ایتھوپیا کے پاکستان میں تعینات سفیر ڈاکٹر جمال بکر عبداللہ نے پیر کے روز وزارت دفاع میں سیکرٹری دفاع لیفٹیننٹ جنرل (ر) محمد علی HI(M) سے ملاقات کی۔
ملاقات میں دونوں ممالک کے درمیان دوطرفہ اور کثیر الجہتی تعاون کو فروغ دینے پر تبادلہ خیال ہوا۔ دونوں اطراف نے موجودہ دوطرفہ تعلقات کا جائزہ لیا اور ان تعلقات کو مزید مضبوط بنانے کے لیے باہمی عزم کا اظہار کیا۔
ملاقات کے دوران، سفیر نے سیکرٹری دفاع کو ایتھوپیا کے وزیراعظم عزت مآب ڈاکٹر ابی احمد کی قیادت میں ہونے والی اہم سیاسی، سماجی اور قانونی اصلاحات کے بارے میں بریفنگ دی۔ انہوں نے اسلام آباد میں ایتھوپیا کے سفارت خانے کے قیام اور پاکستان میں ایتھوپین ایئر لائنز کے آپریشنز کے آغاز کی وجہ سے دوطرفہ تعلقات میں نئی جہت کا حوالہ دیا۔ سفیر نے ایتھوپیا کی اسٹریٹجک علاقائی پوزیشن، خطے میں امن و سلامتی کے لیے اس کی اہم شراکت، اور علاقائی انضمام کو فروغ دینے میں اس کے نمایاں کردار کو بھی اجاگر کیا۔
سیکرٹری دفاع نے پائیدار ترقی کے حصول کے لیے ایتھوپیا کی جانب سے کیے گئے اقتصادی اصلاحات کو سراہا۔ انہوں نے ایتھوپیا سمیت افریقی اقوام کے ساتھ پاکستان کے تعلقات کو بڑھانے کے غیر متزلزل عزم کو دہرایا۔ سیکرٹری دفاع نے سفیر کو دونوں ممالک کے درمیان دوطرفہ تعاون کو آگے بڑھانے میں اپنی مکمل حمایت کا یقین دلایا۔
