پاکستان آذربائیجان کے ساتھ برادرانہ تعلقات مزید مضبوط بنانے کے لیے پرعزم ہے، وزیراعظم شہباز شریف

اسلام آباد (پی پی اے) وزیراعظم محمد شہباز شریف نے آذربائیجان کے ساتھ برادرانہ تعلقات کو مزید مضبوط بنانے کے پاکستان کے غیر متزلزل عزم کا اعادہ کرتے ہوئے کہا ہے کہ دونوں ممالک کے درمیان مختلف شعبوں میں تعاون کا فروغ دونوں عوام کے مشترکہ مفاد میں ہےوزیراعظم سے جمعہ کو اسلام آباد میں پاکستان میں تعینات جمہوریہ آذربائیجان کے سفیر خضر فرہادوف نے الوداعی ملاقات کی وزیراعظم آفس کے میڈیا ونگ کے مطابق نائب وزیراعظم و وزیر خارجہ سینیٹر محمد اسحاق ڈار اور سیکرٹری خارجہ آمنہ بلوچ بھی اس موقع پر موجود تھے ملاقات کے دوران وزیراعظم نے سفیر خضر فرہادوف کی سفارتی ذمہ داریوں کے دوران پاکستان اور آذربائیجان کے درمیان برادرانہ تعلقات کو مزید مستحکم بنانے کے لیے ان کی خدمات کو سراہا۔ انہوں نے سیاسی تجارتی اقتصادی دفاعی ثقافتی اور عوامی روابط کے فروغ خصوصاً دونوں ممالک کے درمیان براہِ راست پروازوں کے آغاز میں ان کی کاوشوں کو قابلِ تحسین قرار دیا وزیراعظم نے آذربائیجان کے صدر الہام علیوف کے لیے نیک تمناؤں کا اظہار کرتے ہوئے گزشتہ اڑھائی برس کے دوران آذربائیجان کے اپنے متعدد دوروں اور جولائی 2024ء میں صدر الہام علیوف کے دورۂ پاکستان کی خوشگوار یادوں کا بھی ذکر کیا انہوں نے اس اعتماد کا اظہار کیا کہ سفیر خضر فرہادوف کے دورِ تعیناتی میں قائم ہونے والی مضبوط بنیاد مستقبل میں دونوں ممالک کے تعلقات کو مزید وسعت دینے میں اہم کردار ادا کرے گی وزیراعظم نے سفیر فرہادوف کے لیے آئندہ ذمہ داریوں میں نیک خواہشات اور کامیابی کی دعا بھی کی اس موقع پر آذربائیجان کے سفیر خضر فرہادوف نے اپنی تعیناتی کے دوران حکومتِ پاکستان اور پاکستانی عوام کی جانب سے ملنے والی گرمجوشی، مہمان نوازی اور بھرپور تعاون پر وزیراعظم کا شکریہ ادا کیا انہوں نے پاکستان میں اپنی تعیناتی کو اپنے سفارتی کیریئر کا یادگار اور قابلِ فخر باب قرار دیتے ہوئے پاکستان کے ساتھ اسٹریٹجک شراکت داری کو مزید مضبوط بنانے کے آذربائیجان کے عزم کا اعادہ کیا ملاقات کے اختتام پر سفیر خضر فرہادوف نے وزیراعظم شہباز شریف کو اپنے خاندان کے پاکستان میں قیام کے تجربات پر مبنی ایک کتاب بھی پیش کی