اسلام آباد : انسپکٹر جنرل پولیس اسلام آباد، سید علی ناصر رضوی نے جی-6 امام بارگاہ کا دورہ کرتے ہوئے محرم الحرام کے سکیورٹی انتظامات کا تفصیلی جائزہ لیا اس موقع پر انہوں نے جلوس کے روٹس پوائنٹ ڈیوٹیز اور روف ٹاپ ڈیوٹیز کا معائنہ کیا اور تعینات پولیس افسران و اہلکاروں کی کارکردگی کا جائزہ لیا
آئی جی اسلام آباد نے سکیورٹی ڈیوٹی پر مامور افسران سے بریفنگ لی اور اس بات پر زور دیا کہ محرم الحرام کے دوران فول پروف سکیورٹی کو ہر صورت یقینی بنایا جائے انہوں نے موقع پر موجود ڈی آئی جیز اور دیگر سینئر پولیس افسران کو ضروری ہدایات جاری کرتے ہوئے کہا کہ تمام سکیورٹی انتظامات کو مزید مؤثر بنایا جائے اور کسی بھی ہنگامی صورتحال سے نمٹنے کے لیے مکمل تیاری رکھی جائے انہوں نے کہا کہ شہریوں کی جان و مال کا تحفظ اسلام آباد پولیس کی اولین ترجیح ہے اور محرم الحرام کے جلوسوں اور مجالس کے پرامن انعقاد کے لیے تمام دستیاب وسائل بروئے کار لائے جا رہے ہیں۔ آئی جی اسلام آباد نے افسران کو ہدایت کی کہ وہ مسلسل فیلڈ میں موجود رہ کر سکیورٹی اقدامات کی نگرانی کریں اور عوام کو ہر ممکن سہولت فراہم کریں
