پاکستان نے مالدیپ میں تاریخ رقم کر دی، ڈائمنڈ جوبلی انٹرنیشنل فٹبال ٹورنامنٹ جیت لیا

مالے : پاکستان نے 74 سال بعد بین الاقوامی فٹبال میں تاریخی کامیابی حاصل کرتے ہوئے ڈائمنڈ جوبلی انٹرنیشنل فٹبال ٹورنامنٹ کا ٹائٹل اپنے نام کر لیا۔ فائنل میں افغانستان کو 2-0 سے شکست دے کر قومی ٹیم نے پہلی مرتبہ کسی اسٹینڈ اَلون بین الاقوامی فٹبال ٹورنامنٹ کے فائنل میں فتح حاصل کی مالدیپ کے دارالحکومت مالے میں کھیلے گئے فائنل میں پاکستان کی جانب سے شایق دوست اور ہارون حمید نے گول اسکور کیے۔ شایق دوست نے پہلے ہاف میں شاندار اوور ہیڈ کک کے ذریعے پاکستان کو برتری دلائی جبکہ ہارون حمید نے اضافی وقت کے آخری لمحات میں انفرادی مہارت کا مظاہرہ کرتے ہوئے دوسرا گول کر کے فتح پر مہر ثبت کر دی قومی ٹیم نے پورے ٹورنامنٹ میں ناقابل شکست رہتے ہوئے مسلسل تیسری کامیابی حاصل کی اور ٹائٹل جیت کر پاکستانی فٹبال کی تاریخ کا نیا باب رقم کر دیا۔ پاکستان کی اس سے قبل آخری بین الاقوامی ٹورنامنٹ کامیابی 1952ء کے ایشین کواڈرینگولر فٹبال ٹورنامنٹ میں تھی، جہاں قومی ٹیم نے بھارت کے ساتھ مشترکہ طور پر ٹرافی جیتی تھی فائنل میں افغانستان نے جارحانہ آغاز کیا تاہم پاکستان نے جلد ہی کھیل پر کنٹرول حاصل کر لیا۔ 24ویں منٹ میں اوٹس خان کی جانب سے بنائے گئے موقع سے فائدہ اٹھاتے ہوئے شایق دوست نے دیدہ زیب اوور ہیڈ کک کے ذریعے گیند جال کی نذر کر دی۔ افغانستان نے برابری کی بھرپور کوشش کی لیکن پاکستانی دفاع اور گول کیپر ثاقب حنیف نے عمدہ کھیل پیش کرتے ہوئے حریف کو کامیابی سے روکے رکھا دوسرے ہاف میں پاکستان نے کئی خطرناک حملے کیے جبکہ عادل نبی کی کوشش کراس بار سے ٹکرا گئی۔ میچ کے اختتامی لمحات میں متبادل کھلاڑی ہارون حمید نے افغان دفاع کو چکمہ دے کر شاندار گول اسکور کیا اور قومی ٹیم کی تاریخی فتح یقینی بنا دی پاکستان فٹبال فیڈریشن کے صدر سید محسن گیلانی نے تاریخی کامیابی پر قوم، کھلاڑیوں اور کوچنگ اسٹاف کو مبارکباد دیتے ہوئے کہا کہ یہ ان کے دورِ صدارت کا سب سے یادگار لمحہ ہے۔ انہوں نے کہا کہ خواتین قومی ٹیم کی تاریخی کامیابیوں کے بعد مردوں کی قومی ٹیم نے بھی نئی تاریخ رقم کر دی ہے۔ ان کے بقول یہ فتح پاکستانی فٹبال کے روشن مستقبل کی بنیاد ثابت ہوگی اور دنیا کو یہ پیغام دیتی ہے کہ پاکستان فٹبال میں بے پناہ صلاحیت، عزم اور عالمی سطح پر کامیابی حاصل کرنے کی مکمل اہلیت رکھتا ہے
محسن گیلانی نے اس عزم کا اظہار بھی کیا کہ قومی ٹیم کو مزید وسائل اور سہولیات فراہم کی جائیں گی تاکہ وہ مستقبل میں بھی عالمی سطح پر پاکستان کا نام روشن کرتی رہے۔ یہ تاریخی کامیابی پاکستانی فٹبال کے لیے ایک نئے دور کا آغاز سمجھی جا رہی ہے اور شائقین کو مستقبل میں مزید کامیابیوں کی امید دلا رہی ہے