پاکستان کا کاوا والی بال چیمپئن شپ میں فاتحانہ آغاز پاکستان نے سری لنکا کو یکطرفہ مقابلے میں 3-0 سے شکست دے دی

اسلام آباد : زونگ 5G سینٹرل ایشین والی بال ایسوسی ایشن (CAVA) مینز والی بال چیمپئن شپ 2026 کے تیسرے میچ میں میزبان پاکستان نے شاندار کھیل کا مظاہرہ کرتے ہوئے سری لنکا کو مسلسل تین سیٹس میں شکست دے کر ایونٹ کا فاتحانہ آغاز کیا پاکستانی ٹیم نے ابتدا ہی سے میچ پر اپنی گرفت مضبوط رکھی اور ہر شعبے میں حریف پر واضح برتری دکھائی۔ قومی ٹیم نے پہلا سیٹ 25-16 دوسرا 25-15 اور تیسرا 25-18 سے جیت کر مقابلہ 3-0 سے اپنے نام کر لیا میچ کے دوران پاکستانی کھلاڑیوں نے مؤثر سروس مضبوط بلاکنگ اور شاندار اسپائکس کے ذریعے سری لنکا کو کسی بھی مرحلے پر میچ میں واپسی کا موقع نہیں دیا قومی ٹیم کی بہترین کارکردگی پر اسٹیڈیم میں موجود شائقین نے بھرپور جوش و خروش کا مظاہرہ کرتے ہوئے کھلاڑیوں کی مسلسل حوصلہ افزائی کی اس کامیابی کے ساتھ پاکستان نے چیمپئن شپ میں اپنے سفر کا کامیاب آغاز کیا جبکہ قومی ٹیم کی اس عمدہ کارکردگی سے ایونٹ میں مزید کامیابیوں کی توقعات بھی بڑھ گئی ہیں