پاک اٹلی تعلقات کے فروغ کا عزم، اٹلی کے 80ویں یومِ جمہوریہ پر اسلام آباد میں پروقار تقریب

اسلام آباد (پی پی اے)
پاکستان میں اطالوی سفارت خانے کے زیر اہتمام اٹلی کے 80ویں یومِ جمہوریہ کے موقع پر ایک پروقار تقریب اور عشائیے کا انعقاد کیا گیا، جس میں چیئرمین سینیٹ سید یوسف رضا گیلانی وفاقی وزیر ریلوے حنیف عباسی سفرا سفارت کاروں وفاقی وزرا اور مختلف شعبہ ہائے زندگی سے تعلق رکھنے والی ممتاز شخصیات نے شرکت کی وزیر مملکت علی پرویز ملک تقریب کے مہمانِ خصوصی تھے تقریب کا آغاز پاکستان اور اٹلی کے قومی ترانوں سے کیا گیا اپنے خطاب میں علی پرویز ملک نے اٹلی کو یومِ جمہوریہ کی مبارکباد دیتے ہوئے کہا کہ پاکستان اور اٹلی کے درمیان 78 سالہ تعلقات باہمی اعتماد اور تعاون پر مبنی ہیں انہوں نے کہا کہ دونوں ممالک کے درمیان تجارت سرمایہ کاری اور مختلف شعبوں میں تعاون کے وسیع مواقع موجود ہیں پاکستان میں اٹلی کی سفیر ماریلینا آرمیلین نے کہا کہ پاکستان میں ان کا سفارتی دور انتہائی یادگار رہا انہوں نے بتایا کہ یورپی یونین میں سب سے بڑی پاکستانی برادری اٹلی میں مقیم ہے اور دونوں ممالک کے درمیان قونصلر، تعلیمی اور معاشی تعاون میں مسلسل اضافہ ہو رہا ہے انہوں نے کہا کہ لیبر موبیلیٹی معاہدے کے تحت آئندہ تین برسوں میں 10 ہزار 500 پاکستانیوں کو اٹلی میں روزگار کے مواقع فراہم کیے جائیں گے، جبکہ 2025-26 کے دوران 3 ہزار 200 پاکستانی طلبہ کو اطالوی جامعات میں تعلیم کے لیے وظائف دیے گئے ہیں
تقریب کے اختتام پر اٹلی کے 80ویں یومِ جمہوریہ کا کیک کاٹا گیا اور پاک اٹلی دوستی و تعاون کے فروغ کے عزم کا اعادہ کیا گیا