دیارِ غیر میں دیانت داری سے رزقِ حلال کمانا عظیم عبادت اور مملکتِ سعودی عرب کے قوانین کا احترام ہماری اولین ذمہ داری ہے سینیٹر پروفیسر ڈاکٹر حافظ عبدالکریم

جدہ (محمد اکرم اسد)امیرِ مرکزی جمعیت اہلحدیث پاکستان و سینیٹر پروفیسر ڈاکٹر حافظ عبدالکریم نے تارکینِ وطن اوورسیز پاکستانیز کی خدمات کو سراہتے ہوئے کہا کہ پردیس میں رہ کر اللہ کا فضل روزگار تلاش کرنا ایک انتہائی فضیلت والا عمل ہے۔ اگر انسان دیانت داری امانت داری اور اخلاص کے ساتھ رزقِ حلال کمائے تو یہ محنت اور مزدوری بھی اللہ کے ہاں ایک عظیم عبادت کا درجہ رکھتی ہے انہوں نے رفقاء کو تاکید کی کہ وہ اپنے روزگار میں ہمیشہ امانت و دیانت کے اعلیٰ معیار قائم رکھیں وہ یہاں معروف کاروباری و دینی شخصیت مرزا احمد بیگ کی میزبانی میں منعقدہ ایک عظیم الشان تعلیمی و دعوتی تقریب سے صدارتی خطاب کر رہے تھے جس میں جدہ میں مقیم علم دوست رفقاء اور محبانِ دین نے بھرپور شرکت کی ان کے ہمراہ عالمی شہرت یافتہ دعوتی و اشاعتی ادارے دارالسلام کے بانی و رئیس عبدالملک مجاہد اور مایہ ناز خطیبِ پاکستان قاری یاسین حیدر بھی جلوہ افروز تھے دوسرے اہم نکتے پر بات کرتے ہوئے ڈاکٹر حافظ عبدالکریم نے فرمایا کہ مملکتِ سعودی عرب حرمین شریفین کی مقدس سرزمین توحید کا مرکز اور اسلامی قوانین کا گہوارہ ہے یہ ملک ہم سب کا دوسرا گھر ہے اور اس سے محبت ہمارے ایمان کا حصہ ہے انہوں نے حاضرین پر زور دیا کہ مملکتِ سعودی عرب کے قوانین کی مکمل پاسداری کریں اور سوشل میڈیا پر کیے جانے والے کسی بھی قسم کے منفی پروپیگنڈے کا نہ تو خود حصہ بنیں اور نہ ہی اس سے متاثر ہوں انہوں نے کہا کہ اس مقدس سرزمین کے امن و امان اور وقار کا تحفظ ہم سب کی اخلاقی اور ملی ذمہ داری ہے انہوں نے میزبانِ مرزا احمد بیگ کی والہانہ محبت اور بے مثال میزبانی کو سراہتے ہوئے ان کا اور چیف آرگنائزر اور ناظم تقریب عبدالقیوم سلفی اور تمام شرکاء کا دل کی گہرائیوں سے شکریہ ادا کیا امیرِ جمعیت نے مرزا احمد بیگ پر خصوصی شفقت محبت اور پیار کا اظہار کرتے ہوئے ان کی دعوتی خدمات کو گراں قدر قرار دیا تقریب کے اختتام پر چیف آرگنائزر عبدالقیوم سلفی نے تمام مہمانانِ گرامی اور حاضرینِ مجلس کا شکریہ ادا کیا اس موقع پر موجود حاضرین نے امیرِ محترم کے فکری ارشادات کو وقت کی اہم ضرورت قرار دیتے ہوئے انتظامیہ اور میزبانِ اعلیٰ کا شکریہ ادا کیا یہ یادگار بزم ملک و ملت کی سلامتی اور امتِ مسلمہ کے اتحاد کی دعاؤں کے ساتھ اپنے اختتام کو پہنچی