امریکا کے 250 ویں یومِ آزادی پر صدر اور وزیراعظم کی مبارکباد صدر زرداری کی ٹرمپ کو دورۂ پاکستان کی دعوت وزیراعظم کا پاک۔امریکا تعلقات مزید مضبوط بنانے کے عزم کا اظہار

اسلام آباد :صدر مملکت آصف علی زرداری اور وزیراعظم شہباز شریف نے امریکا کے 250 ویں یومِ آزادی کے موقع پر امریکی صدر ڈونلڈ ٹرمپ اور امریکی عوام کو دلی مبارکباد پیش کرتے ہوئے پاک۔امریکا تعلقات کو مزید مستحکم بنانے کے عزم کا اعادہ کیا ہے ایوانِ صدر سے جاری بیان کے مطابق صدر آصف علی زرداری نے امریکی صدر ڈونلڈ ٹرمپ کے نام اپنے تہنیتی پیغام میں کہا کہ پاکستان اور امریکا کے درمیان مضبوط شراکت داری نہ صرف دونوں ممالک بلکہ خطے کے امن و استحکام کے لیے بھی اہم حیثیت رکھتی ہے صدر مملکت نے ایران سے متعلق سفارتی پیش رفت میں پاکستان کے ثالثی کردار پر امریکا کے اعتماد کو سراہتے ہوئے کہا کہ خطے میں پائیدار امن صرف مذاکرات سفارت کاری اور کشیدگی میں کمی کے ذریعے ہی ممکن ہے انہوں نے پاکستانی عوام کی جانب سے صدر ٹرمپ کو پاکستان کے سرکاری دورے کی دعوت بھی دی دوسری جانب وزیراعظم شہباز شریف نے سماجی رابطے کی ویب سائٹ ایکس پر اپنے پیغام میں کہا کہ پاکستان باہمی احترام مشترکہ مفادات اور دوطرفہ مفید تعاون کی بنیاد پر امریکا کے ساتھ اپنی دیرینہ شراکت داری کو مزید وسعت دینے کے لیے پُرعزم ہے وزیراعظم نے کہا کہ دونوں ممالک کے درمیان سات دہائیوں سے زائد عرصے پر محیط تعلقات وقت کے ساتھ مزید مضبوط ہوئے ہیں جبکہ پاکستانی نژاد امریکی برادری نے دونوں ملکوں کے درمیان روابط کے فروغ میں اہم کردار ادا کیا ہے انہوں نے کہا کہ تاریخ اس بات کی گواہ ہے کہ عالمی امن اور سلامتی کو درپیش اہم چیلنجز کے دوران پاکستان اور امریکا نے کئی مواقع پر ایک دوسرے کے ساتھ مل کر کام کیا وزیراعظم نے جنوبی ایشیا میں امن کے قیام کے لیے صدر ڈونلڈ ٹرمپ کے کردار کو سراہتے ہوئے کہا کہ ان کی سفارتی کوششوں نے ایک ممکنہ تباہ کن جنگ کو روکنے اور لاکھوں نہیں بلکہ کروڑوں انسانی جانوں کو محفوظ بنانے میں مدد دی وزیراعظم نے مزید کہا کہ دنیا کے مختلف خطوں میں تنازعات کے پرامن حل کے لیے صدر ٹرمپ کی مسلسل سفارتی کوششیں قابلِ تحسین ہیں اور پاکستان مستقبل میں بھی امریکا کے ساتھ باہمی اعتماد اور تعاون پر مبنی تعلقات کو مزید فروغ دینے کا خواہاں ہے