وفاقی دارالحکومت میں عید تعطیلات کے دوران ٹریفک کی روانی برقرار رکھنے اور شہریوں کو محفوظ سفری سہولیات فراہم کرنے کے لیے محمد سرفراز ورک کی زیرِ صدارت اہم جائزہ اجلاس منعقد ہوا، جس میں ایس پی ٹریفک سمیت تمام زونل افسران نے شرکت کی۔
اجلاس میں مساجد، پارکوں، تفریحی مقامات، مارکیٹس اور مویشی منڈیوں پر کیے گئے خصوصی ٹریفک انتظامات کا تفصیلی جائزہ لیا گیا۔ چیف ٹریفک آفیسر نے ہدایت جاری کرتے ہوئے کہا کہ عید کے دنوں میں شہریوں کی سہولت اور ٹریفک کی بلا تعطل روانی اولین ترجیح ہونی چاہیے۔
محمد سرفراز ورک نے کہا کہ وفاقی دارالحکومت میں ٹریفک نظام کو مؤثر بنانے کے لیے سیف سٹی کیمروں سے بھی مکمل معاونت حاصل کی جائے گی، جبکہ تمام زونل افسران عید کی چھٹیوں کے دوران فیلڈ میں موجود رہ کر خود انتظامات کی نگرانی کریں گے۔
انہوں نے تمام افسران کو ہدایت کی کہ اہم شاہراہوں، بازاروں اور عوامی مقامات پر ٹریفک کی روانی برقرار رکھنے کے ساتھ شہریوں کے محفوظ سفر کو ہر صورت یقینی بنایا جائے۔
چیف ٹریفک آفیسر نے ون ویلنگ، ہلڑ بازی اور خطرناک ڈرائیونگ میں ملوث عناصر کے خلاف سخت کارروائی کا عندیہ دیتے ہوئے واضح کیا کہ شہریوں کی جان و مال کو خطرے میں ڈالنے والوں کے ساتھ کوئی رعایت نہیں برتی جائے گی، جبکہ قانون کی خلاف ورزی کرنے والوں کے خلاف بلا امتیاز کارروائی عمل میں لائی جائے گی۔
