آزاد کشمیر انتخابات 2026 میرپور ڈویژن کے 13 حلقوں میں آج پولنگ 14 لاکھ سے زائد ووٹرز حقِ رائے دہی استعمال کریں گے 296 امیدوار میدان میں سکیورٹی کے سخت انتظامات

میرپور (پی پی اے) آزاد جموں و کشمیر قانون ساز اسمبلی کے انتخابات 2026 کے پہلے مرحلے کا آغاز آج (پیر) سے ہو رہا ہے میرپور ڈویژن کے تین اضلاع میرپور، کوٹلی اور بھمبر کے 13 انتخابی حلقوں میں ووٹرز اپنے نمائندوں کا انتخاب کریں گے پولنگ صبح 8 بجے سے شام 5 بجے تک بغیر کسی وقفے کے جاری رہے گی الیکشن کمیشن کے مطابق انتخابی عمل کے لیے تمام انتظامات مکمل کر لیے گئے ہیں، انتخابی عملے کو پولنگ کا سامان فراہم کر دیا گیا ہے جبکہ امن و امان برقرار رکھنے کے لیے سکیورٹی کے خصوصی انتظامات کیے گئے ہیں میرپور ڈویژن کے 13 حلقوں میں مجموعی طور پر 14 لاکھ ایک ہزار 439 رجسٹرڈ ووٹرز حقِ رائے دہی استعمال کریں گے، جن میں 7 لاکھ 25 ہزار 118 مرد اور 6 لاکھ 75 ہزار 628 خواتین ووٹرز شامل ہیں انتخابی عمل کے لیے ڈویژن بھر میں 2 ہزار 454 پولنگ اسٹیشنز قائم کیے گئے ہیں۔ ضلع میرپور کے 4 حلقوں میں 597 ضلع کوٹلی کے 6 حلقوں میں ایک ہزار 107 جبکہ ضلع بھمبر کے 3 حلقوں میں 608 پولنگ اسٹیشنز قائم کیے گئے ہیں انتخابی میدان میں پاکستان پیپلز پارٹی پاکستان مسلم لیگ (ن) استحکام پاکستان پارٹی سمیت مختلف سیاسی جماعتوں اور آزاد امیدواروں کے درمیان سخت مقابلہ متوقع ہے۔ مجموعی طور پر 296 امیدوار انتخابات میں حصہ لے رہے ہیں چیف الیکشن کمشنر آزاد کشمیر جسٹس (ر) غلام مصطفیٰ مغل نے خبردار کیا ہے کہ ووٹنگ کے عمل میں رکاوٹ ڈالنے یا انتخابی ماحول خراب کرنے والوں کے خلاف قانون کے مطابق سخت کارروائی کی جائے گی چیف سیکرٹری آزاد جموں و کشمیر خوشحال خان کا کہنا ہے کہ پرامن شفاف اور منصفانہ انتخابات کے انعقاد کے لیے تمام ریاستی ادارے مکمل طور پر تیار ہیں اور امن و امان خراب کرنے کی ہر کوشش کو ناکام بنایا جائے گا انتخابات کے پہلے مرحلے میں پولنگ کے آغاز کے ساتھ ہی عوامی فیصلے کا عمل شروع ہو گیا ہے، جبکہ تمام نظریں ووٹنگ کے تناسب اور ابتدائی نتائج پر مرکوز ہیں