چوہدری محمد مشتاق بوکڑہ
سال کے بارہ مہینوں کا سردار، رحمتوں، برکتوں اور مغفرت کا مہینہ رمضان المبارک جب شروع ہوتا ہے تو پورے معاشرے میں ایک روحانی فضا قائم ہو جاتی ہے۔ مساجد آباد ہو جاتی ہیں، دلوں میں خشوع و خضوع بڑھ جاتا ہے اور عبادات کا ذوق اپنے عروج پر پہنچ جاتا ہے۔ افطار اور سحری کی رونقوں سے لے کر نمازِ تراویح تک ہر طرف ایک نورانی ماحول دیکھنے کو ملتا ہے۔
رمضان المبارک کی اصل روح مساجد سے وابستہ ہے اور مساجد کو آباد رکھنے میں سب سے اہم کردار علمائے کرام، مفتیان کرام، قاری حضرات، خطباء اور مؤذنین ادا کرتے ہیں۔ یہی وہ طبقہ ہے جو پورا سال دینِ اسلام کی خدمت میں مصروف رہتا ہے۔ رمضان المبارک میں جب نمازِ تراویح کا آغاز ہوتا ہے تو حافظِ قرآن قاری حضرات قرآنِ مجید سنانے کی سعادت حاصل کرتے ہیں جبکہ علمائے کرام اور مفتیان کرام قرآنِ کریم کے پیغام کو عوام تک پہنچاتے ہیں اور دین کی تعلیمات کو عام کرتے ہیں۔
یہ طبقہ صرف عبادات تک محدود نہیں رہتا بلکہ معاشرے کے ہر دکھ سکھ میں بھی پیش پیش ہوتا ہے۔ کسی کے گھر خوشی ہو یا غم، نکاح ہو یا جنازہ، کوئی دینی مسئلہ درپیش ہو یا معاشرتی رہنمائی کی ضرورت — ہر جگہ یہی علماء اور خطباء عوام کے ساتھ کھڑے نظر آتے ہیں۔ درحقیقت یہ طبقہ معاشرے کی اخلاقی و روحانی رہنمائی کا فریضہ انجام دیتا ہے۔
تاہم افسوسناک حقیقت یہ ہے کہ اسلام اور دین کی خدمت کرنے والا یہی طبقہ آج بھی معاشی مشکلات اور حکومتی عدم توجہ کا شکار ہے۔ ہمارے سرکاری اداروں میں حافظ قرآن قاری حضرات اور خطباء کے گریڈ انتہائی کم ہیں۔ اگر مساجد کے مؤذنین اور خطباء کی تنخواہوں کا ذکر کیا جائے تو یہ سن کر واقعی حیرت ہوتی ہے کہ جو لوگ معاشرے کی دینی و اخلاقی تربیت کرتے ہیں وہ خود معاشی تنگی کا شکار ہیں۔
مساجد میں خدمات انجام دینے والے مؤذن، خطیب اور قاری حضرات کی تنخواہیں اکثر اتنی کم ہوتی ہیں کہ وہ موجودہ مہنگائی کے دور میں اپنی بنیادی ضروریات بھی مشکل سے پوری کر پاتے ہیں۔ کئی جگہوں پر یہ تنخواہیں ایک عام مزدور کی آمدنی سے بھی کم ہوتی ہیں۔ یہ صورتحال نہ صرف تشویشناک ہے بلکہ معاشرتی انصاف کے تقاضوں کے بھی خلاف ہے۔
حال ہی میں وزیراعلیٰ پنجاب محترمہ مریم نواز شریف کی جانب سے علمائے کرام کے لیے 25 ہزار روپے وظیفہ کا اعلان ایک مثبت اور خوش آئند قدم ہے۔ یہ اقدام اس بات کا اعتراف ہے کہ علمائے کرام اور دینی خدمت انجام دینے والے افراد معاشرے کے اہم ستون ہیں۔ تاہم یہ وظیفہ عارضی کے بجائے مستقل بنیادوں پر ہونا چاہیے تاکہ آنے والی حکومتیں اسے ختم نہ کر سکیں اور علماء کو مستقل معاشی تحفظ حاصل ہو۔
اسی طرح ضرورت اس امر کی بھی ہے کہ وفاقی حکومت بھی اس حوالے سے سنجیدہ اقدامات کرے اور اس سہولت کو پورے ملک میں نافذ کیا جائے۔ خصوصاً وفاقی دارالحکومت اسلام آباد کی سرکاری مساجد میں خطیب اور قاری حضرات کے گریڈ پر نظرثانی کی ضرورت ہے۔
اسلام آباد کی سرکاری مساجد میں ایک حافظ قرآن قاری کا گریڈ اس وقت گریڈ 11 ہے جو کہ ایک عام کلرک کے برابر ہے۔ جبکہ ایک خطیب یا مفتی بھی بامشکل اپنی مدت ملازمت پوری کرنے کے قریب ہوتا ہے وہ 16 یا 17 گریڈ تک پہنچ پاتا ہے۔ یہ صورتحال اس طبقے کے ساتھ واضح ناانصافی کے مترادف ہے۔
ضرورت اس امر کی ہے کہ سرکاری مساجد میں خطیب کا گریڈ کم از کم گریڈ 17 سے شروع کیا جائے جبکہ قاری حضرات کے لیے گریڈ 16 مقرر کیا جائے۔ اس طرح نہ صرف ان کی معاشی حالت بہتر ہو گی بلکہ نوجوان نسل میں دینی تعلیم اور حفظ قرآن کی طرف رجحان بھی بڑھے گا۔ہمارے معاشرے کے اس مقام پر فائز دین اور اسلام کی خدمت کرنے والے علمائے کرام کی خدمت حکومت اور معاشرے کی اجتماعی ذمہ داری ہے۔ عوام کو بھی چاہیے کہ وہ اپنی مساجد کے امام، خطیب اور مؤذن کا خیال رکھیں اور ان کی عزت و تکریم کے ساتھ ساتھ ان کی معاشی مدد بھی کریں۔ کیونکہ یہی وہ لوگ ہیں جو ہمارے بچوں کی دینی تربیت کرتے ہیں اور ہمیں دین کی صحیح رہنمائی فراہم کرتے ہیں۔
رمضان المبارک کا مہینہ ہمیں ایثار، قربانی اور دوسروں کی مدد کا درس دیتا ہے۔ اس مقدس مہینے میں اگر ہم واقعی دین کی خدمت کرنا چاہتے ہیں تو ہمیں دین کے خادموں کی قدر کرنی ہوگی۔اگر حکومت اور معاشرہ مل کر اس طبقے کی فلاح و بہبود کے لیے سنجیدہ اقدامات کریں تو نہ صرف علماء کی زندگی میں آسانی آئے گی بلکہ پورے معاشرے کی دینی اور اخلاقی بنیادیں بھی مضبوط ہوں گی۔
یہ وقت کا تقاضا ہے کہ ہم دین کے حقیقی خادموں کو وہ مقام اور سہولیات فراہم کریں جن کے وہ حق دار ہیں۔ کیونکہ جو معاشرہ اپنے روحانی رہنماؤں کی قدر کرتا ہے، وہی معاشرہ حقیقی معنوں میں ترقی اور استحکام کی راہ پر گامزن ہوتا ہے۔
مصنف قومی اسمبلی میں اسسٹنٹ ڈائریکٹر میڈیا ہیں
