پاکستان تیسری بار کاوا مینز والی بال چیمپئن بن گیا بنگلہ دیش رنر اپ گرین شرٹس نے پورے ٹورنامنٹ میں ایک بھی سیٹ گنوائے بغیر ٹائٹل اپنے نام کر لیا

اسلام آباد : سینٹرل ایشین والی بال ایسوسی ایشن (کاوا) مینز والی بال چیمپئن شپ 2026 کا ٹائٹل پاکستان نے شاندار اور ناقابلِ شکست کارکردگی کے ساتھ اپنے نام کر لیا جبکہ بنگلہ دیش دوسرے اور سری لنکا تیسرے نمبر پر رہا لیاقت جمنازیم پاکستان اسپورٹس کمپلیکس اسلام آباد میں کھیلے گئے چیمپئن شپ کے فائنل میں قومی والی بال ٹیم نے بنگلہ دیش کو 3-0 سے شکست دے کر مسلسل تیسری مرتبہ کاوا مینز والی بال چیمپئن بننے کا اعزاز حاصل کیا پاکستان نے فائنل میں 25-20، 25-16 اور 25-20 سے کامیابی حاصل کرتے ہوئے ٹائٹل اپنے نام کیا قومی ٹیم نے پورے ٹورنامنٹ کے دوران غیرمعمولی کھیل کا مظاہرہ کیا۔ پاکستانی کھلاڑیوں نے بہترین ٹیم ورک مضبوط دفاع، مؤثر بلاکنگ جارحانہ اسماشز اور عمدہ سروسز کے ذریعے ہر حریف کو زیر کیا گرین شرٹس نے پورے ایونٹ میں ایک بھی سیٹ گنوائے بغیر ناقابلِ شکست رہتے ہوئے ٹرافی اپنے نام کی جو کاوا مینز والی بال چیمپئن شپ کی تاریخ میں ایک یادگار کامیابی ہے اس تاریخی فتح کے ساتھ پاکستان نے کاوا مینز والی بال چیمپئن شپ کا تیسرا ٹائٹل جیت کر خطے میں اپنی برتری ایک بار پھر ثابت کر دی بنگلہ دیش نے عمدہ کھیل پیش کرتے ہوئے رنر اپ پوزیشن حاصل کی ادھر تیسرے نمبر کے میچ میں سری لنکا نے انتہائی سنسنی خیز مقابلے کے بعد ازبکستان کو 3-2 سے شکست دے کر برانز میڈل اپنے نام کیا چیمپئن شپ کے اختتام پر قومی ٹیم کی شاندار کامیابی پر شائقین نے بھرپور جشن منایا جبکہ پاکستان والی بال فیڈریشن کے حکام نے کھلاڑیوں اور کوچنگ اسٹاف کی کارکردگی کو سراہتے ہوئے اس کامیابی کو ملکی والی بال کے لیے ایک تاریخی سنگِ میل قرار دیا