پاکستان فٹبال فیڈریشن (پی ایف ایف) نے اعلان کیا ہے کہ مسٹر عدیل رزکی یکم جولائی 2026 سے فیڈریشن کے نئے ٹیکنیکل ڈائریکٹر کی ذمہ داریاں سنبھالیں گے
مسٹر عدیل رزکی اس سے قبل پاکستان ویمنز نیشنل فٹبال ٹیم کے ہیڈ کوچ رہ چکے ہیں۔ حال ہی میں انہوں نے پاکستان مینز نیشنل ٹیم کے کوچنگ اسٹاف میں مسٹر نولبرٹو سولانو کے اسسٹنٹ کے طور پر خدمات انجام دیں، جہاں پاکستان نے مالدیپ میں منعقدہ ڈائمنڈ جوبلی انٹرنیشنل فٹبال ٹورنامنٹ میں تاریخی کامیابی حاصل کی
مسٹر رزکی یوئیفا اے لائسنس ہولڈر ہیں اور 2019 کے بعد پاکستان فٹبال فیڈریشن کے پہلے ٹیکنیکل ڈائریکٹر ہوں گے اپنی نئی ذمہ داری میں وہ پاکستان میں فٹبال کی تکنیکی ترقی کے قومی پروگرام کی قیادت کریں گے اور گراس روٹس، ویمنز فٹبال، کوچز کی تربیت اور یوتھ فٹبال سمیت کھیل کے تمام شعبوں کے لیے طویل المدتی حکمتِ عملی تیار کریں گے تاکہ ان تمام شعبوں کو ایک مربوط ترقیاتی نظام کے تحت آگے بڑھایا جا سکے۔ وہ تکنیکی امور اور کوچنگ سے متعلق معاملات پر پی ایف ایف ایگزیکٹو کمیٹی کو بھی مشاورت فراہم کریں گے
مسٹر رزکی کی تقرری پی ایف ایف کے صدر سید محسن گیلانی کی جانب سے پاکستان میں فٹبال کی ترقی کے لیے اٹھایا جانے والا ایک اور اہم قدم ہے
صدر سید محسن گیلانی نے کہا
“کسی بھی فٹبال فیڈریشن کے لیے تکنیکی ترقی سب سے اہم شعبوں میں سے ایک ہوتی ہے، اور ٹیکنیکل ڈائریکٹر ملک میں فٹبال کی ترقی کے پروگرام کی سمت متعین کرنے اور اس کی قیادت کرنے میں نہایت اہم کردار ادا کرتا ہے۔ عدیل کی تقرری کے ساتھ ہم ملک میں فٹبال کی ترقی کے ایک نئے مرحلے میں داخل ہو رہے ہیں، اور مجھے امید ہے کہ ہم اپنے مطلوبہ اہداف کے حصول کی جانب مؤثر پیش رفت کریں گے۔
مسٹر رزکی، جو اس وقت پی ایف ایف کانگریس کے رکن بھی ہیں، ٹیکنیکل ڈائریکٹر کا عہدہ سنبھالنے کے بعد کانگریس کی اپنی ذمہ داری سے الگ ہو جائیں گے۔
مسٹر عدیل رزکی نے کہا
“اللہ تعالیٰ کے فضل و کرم سے، پاکستان فٹبال فیڈریشن کا ٹیکنیکل ڈائریکٹر مقرر ہونا میرے لیے ایک بہت بڑا اعزاز ہے
میں صدر سید محسن گیلانی کا تہہ دل سے شکر گزار ہوں کہ انہوں نے پاکستان میں فٹبال کے لیے اس اہم مرحلے پر مجھ پر اعتماد کرتے ہوئے یہ ذمہ داری سونپی
2022 سے مجھے پاکستان ویمنز نیشنل ٹیم کے ہیڈ کوچ کے طور پر خدمات انجام دینے کا اعزاز حاصل رہا، اور یہ سفر میرے لیے انتہائی یادگار رہا ہے۔ اس دوران میں نے پاکستان میں ویمنز فٹبال کو مسلسل آگے بڑھتے اور ترقی کرتے دیکھا ہے۔ 2024 سے مجھے پی ایف ایف کانگریس کے رکن کی حیثیت سے بھی خدمات انجام دینے کا موقع ملا، جہاں میں نے فٹبال کی مجموعی سمت اور انتظامی معاملات میں اپنا کردار ادا کیا
اب ٹیکنیکل ڈائریکٹر کی نئی ذمہ داری سنبھالتے ہوئے میں اپنے سابقہ عہدوں سے الگ ہو جاؤں گا تاکہ پوری توجہ کے ساتھ وسیع تر سطح پر پاکستان میں فٹبال کے مستقبل کی تعمیر میں اپنا کردار ادا کر سکوں
فٹبال لوگوں کو ایک دوسرے کے قریب لانے، معاشرے کو جوڑنے اور آنے والی نسلوں کے لیے نئے مواقع پیدا کرنے کی بے پناہ صلاحیت رکھتا ہے۔ مجھے پورا یقین ہے کہ پاکستان میں بے مثال صلاحیت موجود ہے، اور ہم سب مل کر ایک ایسا جدید، مضبوط اور کامیاب فٹبال نظام تشکیل دے سکتے ہیں جو آنے والے برسوں تک ملک کی خدمت کرے
ٹیکنیکل ڈائریکٹر کے طور پر میری ترجیح یہ ہوگی کہ ملک میں فٹبال کے ہر درجے کے لیے ایک واضح تکنیکی وژن وضع کیا جائے، کوچز کی تربیت کو مزید مضبوط بنایا جائے، کھلاڑیوں کی ترقی کے واضح راستے قائم کیے جائیں، کوچنگ اور کھیل کے طریقۂ کار کو بہتر بنایا جائے، اور ایسے مضبوط نظام تشکیل دیے جائیں جو پاکستان کو طویل مدت تک کامیابیاں دلا سکیں
ترقی کے لیے ہم آہنگی، باہمی تعاون اور فٹبال سے وابستہ تمام افراد کی مشترکہ وابستگی ضروری ہے۔ میں فیڈریشن کی قیادت کلبوں اکیڈمیوں کوچز کھلاڑیوں علاقائی نمائندوں اور دیگر شراکت داروں کے ساتھ مل کر پاکستان میں فٹبال کے روشن مستقبل کی تعمیر کے لیے کام کرنے کا منتظر ہوں
