اسلام آباد (پی پی اے) جڑواں شہروں راولپنڈی اور اسلام آباد کے شہریوں کے لیے خوشخبری ہے کہ وفاقی ترقیاتی ادارے سی ڈی اے نے اسلام آباد میں ملک کے سب سے بڑے جدید کرکٹ اسٹیڈیم کی تعمیر کے لیے مالیاتی بولی کھول دی ہے سی ڈی اے کے مطابق حبیب زیڈ کے بی اور ای اے پر مشتمل مشترکہ کنسورشیم کامیاب بولی دہندہ قرار پایا ہے جس نے اسٹیڈیم کی تعمیر اور بیرونی ترقیاتی کاموں کے لیے 8 ارب 90 کروڑ روپے کی بولی دی ہے سی ڈی اے کا کہنا ہے کہ نیسپاک کی جانب سے پیش کردہ بولی کو مناسب قرار دیے جانے اور نرخوں کی حتمی جانچ کے بعد ٹھیکہ باضابطہ طور پر کامیاب کنسورشیم کو دے دیا جائے گا ادارے نے تمام قانونی اور پیپرا کے تقاضے مکمل کرنے کے بعد مالیاتی بولی کھولی جبکہ حتمی منظوری سے قبل کنسلٹنٹ پیش کردہ نرخوں کی معقولیت کا جائزہ لے گا سی ڈی اے حکام کے مطابق اسلام آباد میں نئے کرکٹ اسٹیڈیم کی تعمیر کا کام شروع ہونے کے بعد اسے ایک سال کے اندر مکمل کرنے کی کوشش کی جائے گی منصوبے پر وفاقی وزیر داخلہ چیئرمین سی ڈی اے اور ممبر ماحولیات خصوصی توجہ دے رہے ہیں تاکہ منصوبہ مقررہ مدت میں پایۂ تکمیل تک پہنچ سکے۔
نیا کرکٹ اسٹیڈیم سیکٹر ڈی 12 کے قریب مارگلہ ہلز کے دامن میں تعمیر کیا جائے گا حکام کے مطابق اسٹیڈیم کو دبئی کرکٹ اسٹیڈیم کی طرز پر جدید سہولیات سے آراستہ کیا جائے گا جہاں 35 ہزار شائقین کے بیٹھنے کی گنجائش ہوگی منصوبے کے تحت اسٹیڈیم کے ساتھ 3 کلومیٹر طویل تین رویہ سڑکیں اور دیگر متعلقہ انفراسٹرکچر بھی تعمیر کیا جائے گا سی ڈی اے کے مطابق کامیاب کنسورشیم کو قذافی اسٹیڈیم لاہور کی تعمیر و تزئین کا وسیع تجربہ حاصل ہے جس کے باعث توقع ہے کہ اسلام آباد کا یہ منصوبہ بھی اعلیٰ معیار کے مطابق مکمل کیا جائے گا
